kulturgileak gizarte mugimenduetan - Euskara

Bestalde, akademikoak badaki unibertsitate esparruari dagokionez
instituzioaren barne hierarkiek zuzendutako irizpideek eta karrera
akademikoaren arauek definitzen dutela bere posizioa harremanezko
esparruan.
Hortik aurrera unibertsitarioen artean, daudenen artean… Bueno hor badago
oso egitura hierarkikoa, funtzionaritzak ekarri izan duena, zeren azkenean klub
bat dago, doktoreak direnak eta ez direnak, ja badago lehenbiziko bereizketa.
Klub bat, ezta? Goren mailako bereizketa hori estandarizatua dago. Goren
mailako formazio akademikoa tesia egin arte luatzen da. Horretaz aparte,
sexenioak, ikerkuntza, ikertzaile izatea, titular izatea, ikertzaile izateko doktore
izan behar da, katedraduna… eta gero, bueno, institutu bateko buru izatea edo
ez dakit. Ba, hor, alderdi formala edo krematistikoa aparte utzita, ze hor bere
bidea egiten du, eta batzutan guk curriculuma egin behar dugunean, formalismo
batzuk eskatzen digute: kanpoko aldizkarietan eta honelako sarrera edo
zabalkuntza duten aldizkari horietan idatzi izateak honenbeste dakarkizu,
ikerketa zigilua betetzen baduzu honenbeste. Eta gero gure bizibidea dena,
eskolak ematea, ba ez da puntuatzen, ezta? (8. Elkarrizketa)
Horrenbestez, lehiazko esparru batean jokatu behar du
unibertsitarioak, esparruak jarritako arauekin eta esparruak onetsitako
baliabide legitimoekin. Arau horien arabera, Euskal Herriko
unibertsitateetan ezarrita dauden karrera akademikoaren erabideek eta
ebaluazio irizpideek baliabide kultural batzuk lehenesten dituzte, hau da,
unibertsitate horietan dauden bikaintasun kulturalaren ikurrak hizkuntza —
kultura— baten markoan hartzen dute zentzua. Horrela, gizartean nagusi
den hizkuntza bera atzematen dugu gailen unibertsitate sisteman ere. Hala
gizartean nola unibertsitatean hizkuntza nagusiak bideratzen ditu jardun
kulturalaren adierazpen gehienak. Hartara, unibertsitate irakaskuntzaren
atal batzuek hizkuntza minorizatuari ateak itxi ez badizkiote ere,
hizkuntzen arteko hierarkiak bere horretan dirau unibertsitatearen jardun
orokorrean. Gizarte bizitzan bezala, mundu akademikoan —irakaskuntzan
ez ezik ikerkuntzan, sorkuntzan, argitalpenetan— euskarazko curriculum
akademikoaren erabideak eredu nagusiaren mende makurtu dira. Ildo
653