kulturgileak gizarte mugimenduetan - Euskara

Considero como contenido de la realidad social a las relaciones sociales, esto
es, al conjunto de relaciones entre posiciones sociales (Beltrán, 1991a: 75).
Gizarte espazioa harreman gunea da; bertan dihardute gizakiek.
Esparru sozial orokorraren barruan egoteaz gain kultura eragileak
harreman-mundu espezifikoan ere badaude txertaturik, kultura sortzaile
modura. Harremanezko mikrokosmos horretan eragile sozial indibidualak
eta kolektiboak aritzen dira, hala gizabanakoak nola erakundeak. Beraz,
kultura unibertsoaren harreman sareek gizakiak ez ezik eskola eta
unibertsitate erakundeak ere barnean hartzen dituzte, baita argitaletxe eta
hedabide enpresak, zientzia-, arte- eta literatura-entitateak eta argitalpenak
ere, besteak beste.
Kulturaren unibertsoko partaide izatea ez da, halaz ere, behin betiko
erabakita dagoen egoera, eta esparruaren barruan daudenek ere ez dituzte
modu egonkorrean kokapen berberak izaten. Esparrua, hain zuzen ere,
egoera askotan dauden kulturgileen harremanen arabera definitzen da.
Hemen erabiltzen den adieran, esparruak ez dauzka tartekotzat pentsalari
handiak soilik, hala nola, filosofo, zientzialari eta literaturgile ezagunak.
Horiekin batera daude definizio klasikoetan hala-holako intelektual gisa
agertu direnak ere —“dibulgatzaileak” eta abar—. Izatez, batzuk eta
besteak daude hainbat kokapenen arteko harremanek egituratutako gune
sinbolikoan murgildurik. Guztien arteko harremanek argitzen dituzte,
hurrenez hurren, era askotako tradizio intelektualen koexistentziak, kultura
sortzaileen era askotako jarrerak, kulturgileen arteko lehiak eta itunak baita
defendatutako ondasun sinbolikoen nolakotasuna ere.
Kulturaren esparruak osatutako harremanen ordena bilakabide
historikoaren emaitza izan ohi da. Ordena horrek, ordena izanda ere, une
jakin bateko oreka ezegonkorraren irudia baino ez digu eskaintzen.
126