kulturgileak gizarte mugimenduetan - Euskara

Halaber, esparruak ez dauka ez zatirik ezta osagairik ere. Jarduera gune
irekia da; haren mugak, izatekotan, muga dinamikoak besterik ez dira.
Hartara, era askotako harreman konplexuen jarioa jasotzen duen espazio
mugikorra osatzen du esparruak, ez gune itxi eta estatikoa —sistemak
bezala—.
3.2.2. Kultura esparruaren harremanezko ikuspegia, intelektualaren
definizio positibisten ordezko aukerabidea
Orain arte aipatu diren ezaugarriek erabilgarri egiten dute
esparruaren nozioa kulturaren eta intelektualen mikrounibertsoak
aztertzeko baliabide kontzeptual gisa. Izan ere, kulturan adituak direnen
unibertsoek mikrokosmos erlatiboki autonomo —eta erlatiboki
dependente— modura funtzionatzen dute gizarte modernoetan. Haatik,
kulturgileak esparru berezian kokatzeak ez du esan nahi harreman eremu
horren barnean homogeneotasuna nagusi denik. Kulturgile guztiak ez
daude egoera berean: hainbat kokapenen arteko harreman objektiboek
egituratzen dituzte esparruak, nahiz eta posizio horiek ez dituzten zuzenean
islatzen kokapen sozialak. Kultura ekoizpenaren esparruek, euren
autonomiaren araberako funtzionamendu-oinarri propioak dauzkate.
Esparruaren arauek zuzentzen dituzte bertan kokatzen direnen barne
harremanak eta kulturgileen jardunak. Kulturaren funtzionamendu
printzipioak bide direla azaltzen dira, besteak beste, lehiak eta aliantzak,
esparruan egiten diren lanen defentsak eta kulturgileek euren buruez
osatzen dituzten irudikapenak.
Bereziki oparoa begitandu zaigu esparruaren kontzeptua kulturgileen
multzoa harremanezko ikuspegitik aztertzeko aukera eskaintzen duelako.
93