kulturgileak gizarte mugimenduetan - Euskara

ginoan, kapital ekonomikoaren jabetzaren mende daude, hein handi batean.
Horrenbestez, kapital ekonomikoak premia ekonomikoei buruzko
askatasuna bermatzen du. Horregatik guztiagatik, kulturaren unibertsoan,
bereziki bere hastapenetan, jatorri sozial pribilegiatuari loturiko baldintzak
mesedegarriak izan ohi dira kulturgileentzako premiazkoak diren
ahalmenak sortzeko. Eskola kapitala ez ezik, ausardia eta antzeko
gaitasunak, etekin materialei buruzko axolagabetasun erlatiboa, gizartea
behatzeko “sena” eta joera berriak sumatzeko artea ere oinarrizko
ahalmenak dira ikuspegi sinboliko batetik. Horiek guztiek erantsitako
gaitasuna ematen diete kulturgileei.
Zalantzarik gabe, gizarte estratifikazioak ezarritako kokapenak
eskola kapitala eta baliabide kultural legitimoak eskuratzeko aukerak
baldintzatzen ditu. Halarik ere, kokapen hori ezin da definitu era
murrizgarrian irizpide ekonomiko hutsen arabera, askotan gertatu den
bezala. Kulturaren sarbidea ez dago ezinbestean talde ekonomikoen
osaketari loturik, ez bederen horri soilik. Oso ezaguna da, adibidez,
mailaketa sozioekonomikoan kaltetutako klase eta talde sozialek nozitzen
duten kultura bazterketa. Irizpide ekonomikoekin batera, baina, kultura,
erlijioa, etnia edo hizkuntza taldearen araberako kokapenak ere eragina
dauka aktore sozialen ahalmen kulturaletan. Beraz, desberdintasun sozialen
mapa egitean ekonomiatik bereizitako beste baliabide sozial batzuen
banaketa asimetrikoa ere aintzat behar da hartu era guztietako murriztapen
ereduak ulertu ahal izateko. Ildo horretatik abiatuz, errenta maila bezain
oztopo garrantzitsua izan daiteke hizkuntza- edo kultura-talde baztertuetako
kide izatea legitimaturiko kultura gaitasunak lortzeko unean. Estatuak
kultura legitimo modura ofizialdutako kultura nagusitik landa geratu dira
egoera horretan dauden gizarte eragileak; hizkuntzari dagokionez, kultura
nagusiaren eramaile den hizkuntza-kode nagusitik aparte, hain zuzen ere.
119