kulturgileak gizarte mugimenduetan - Euskara

alu —Nafarroaren kasuan, baina, hobetsi zen prozedura Foruaren
Hobekuntza izan zen eta ez zen erreferendumik egin. Foru Hobekuntzan
esplizituki baiezten da Nafarroa espainiar nazioaren zati bat dela eta ez da
inolako aipurik azaltzen gainerako hiru herrialdeekin bat egiteko aukeraz—
. Estatutuaren eta ondorengo instituzionalizazio soziopolitikoaren inguruan
sortutako jarrera kontrajarriek arrail sakona zabaldu zuten euskalgintzaren
oinarri soziala izandako nazionalismoaren barnean, zehazki esateko,
autonomiaren aldeko nazionalismo kontserbadorearen eta haren aurkako
ezkerreko nazionalismoaren artean. Bestalde, bi erkidegoen eskumenen
kudeaketak eta horrek zuzenean eragindako instituzionalizazioak ondorio
eskergak eduki zituzten euskal kultura esparruaren eraketa hasi-berrian.
Beraz, aztertzen ari garen aldaketa politikoan leudekeen askotariko
dimentsioak alde batera utzita, eraikuntza autonomikoak
instituzio/mugimendu dialektikan eragindako gorabeheretan jarriko dugu
arreta hemendik aurrerako gogoetan.
Estatutua onartu ondoren eta nazionalismo kontserbadorearen
hegemoniaren gidaritzapean, estatuak transferitutako eskumenen kudeaketa
bideratu asmoz zenbait gizarte arlotan sortutako eraketa administratiboak
instituzionalizazio autonomikoa jarri zuen abian. Prozesu orokor modura
hartuta, instituzionalizazio politikoak bi alderdi izan ohi ditu. Lehenik,
azpiegituraren ikuspegitik, gizarte bizitzako jardun esparruak barnean
hartzen dituzten burokrazia oso razionalizatuen sorrera ekarri ohi du.
Bestela adierazita, instituzionalizazio politikoaren prozesuak martxan
daudenean, burokrazia berriek berenganatzen dituzte gizarte bizitzako
jardun esparruei dagozkien auzien eztabaida, kudeaketa eta ebazpena.
Gizarte auziei buruzko eztabaida esparru instituzionaletan kokatuta egonik,
gizarte bizitza eta gizarte harremanak despolitizatu egiten dira; horrela,
gero eta gehiago aldentzen da gizarte bizitzatik bereizitako
547