O Estado oculto - Repositorio Institucional da USC - Universidade ...

A igrexa católica e a transición política:
elementos para un repertorio corporatista
Como xa indicamos ao comezo das partes primeira e segunda, imos abordar
ao longo deste traballo un conxunto de 20 cuestións que consideramos
particularmente importantes, de acordo co previsto no punto 8 da introdución.
Na primeira parte estudamos as tres primeiras cuestións e na segunda parte as
nove seguintes. Estas son as cuestións dos 14 capítulos da terceira parte:
13. Que achegamento pode axudarnos a superar o enfoque formalista e
ahistórico do modelo canónico dos réximes autoritarios e especificamente do
franquismo? Cal foi a natureza do réxime franquista? Até que punto e por que
era pluralista a ditadura? Que importancia tivo o nacionalcatolicismo nesta
etapa histórica?
14. É posíbel asumir a tese dos modelos do repertorio canónico de que a
transición política española foi un fenómeno exclusivamente interno? Debemos
descartar calquera incidencia dos factores e dos actores internacionais? Como
pode repercutir a valoración do impacto do Concilio Vaticano II na
temporalización e na caracterización do proceso de transición? Que eivas
estruturais herda o réxime democrático do proceso de transición?
15. Como debemos valorar criticamente a idea do consenso durante a
transición ante a evidencia do conflito como ingrediente esencial da vida
política? Os modelos canónicos son suficientes para explicarnos a totalidade
dos arranxos cos que se xestionaron e se xestionan os intereses dos grupos en
conflito e se levan a cabo os procesos públicos de toma de decisións? E cales
serían as implicacións destes arranxos para a democracia liberal?
16. Como se pode definir operativamente a igrexa católica no campo da ciencia
social? E como se pode esquematizar a súa estrutura organizativa? Cal é o
posicionamento do Estado ante o poder político da igrexa católica?
260