O Estado oculto - Repositorio Institucional da USC - Universidade ...

pretende facer pasar por unha presión exercida sobre o campo da ciencia
social (e da historiografía), como se se producise unha hipertrofia da dimensión
“política” do campo científico.
Ao comezo da súa quenda presidencial da Unión Europea, no primeiro
semestre de 2007, o Goberno Federal de Alemaña propuxo repescar unha
iniciativa antinegacionista da Comisión de 2001. Neste sentido, o 19 de abril de
2007 o Consello da Unión Europea adoptou unha decisión marco sobre
racismo e xenofobia, 56 entre cuxos obxectivos se atopaba o de acadar a
prohibición legal do negacionismo e a tipificación do correspondente delicto de
condonación, negación ou trivialización ofensiva dos xenocidios e dos crimes
de guerra e contra a humanidade, incluídos os cometidos pola ditadura
hitleriana, que sería penado co castigo de entre un e tres anos de privación de
liberdade. Hai varios países que xa contan cunha lexislación antinegacionista,
así que a iniciativa alemá perseguía a xeneralización deste ius puniendi.
O seguimento do debate público que suscitou esta iniciativa é moi
significativo por varias razóns: (a) pon de relevo unha certa sorpresa e
inxenuidade no tratamento do tema, que deriva, ao noso entender, da
sobrevaloración da autonomía científica e da dimensión “científica” do campo
científico, e, en xeral, da ignorancia das conclusións ás que se chegou na
socioloxía da ciencia e na socioloxía do coñecemento; (b) amosa unha actitude
moi crítica verbo da presión exercida polo campo do poder político sobre o
campo científico; e (c) revela a existencia dunha zona gris que difumina os
límites entre os campos científico e do poder político e pode inducir erros na
análise. As cuestións que se abordaron no debate poden sintetizarse nunha
pregunta, que, como veremos, é propiamente impertinente neste caso: é
conveniente que os gobernos prescriban a historia oficial do xenocidio
nacionalsocialista, que a verdade de Estado se erixa en verdade histórica?
Desde logo, non pretendemos aquí facer un seguimento exhaustivo desta
discusión pública, así que nos limitaremos a aludir brevemente ao seu reflexo
no xornal El País (edición Galiza). En dous editoriais, o xornal considera
incontestábel a shoah, e, polo tanto, falsa a súa negación, pero tamén dubida
da prohibición legal como antídoto contra o negacionismo, porque “supondría
rehabilitar [...] la idea de que los poderes públicos fijan el relato de la historia”, o
54