O Estado oculto - Repositorio Institucional da USC - Universidade ...

Retomamos agora as 20 cuestións formuladas ao comezo de cada unha das
tres partes deste traballo –de acordo co avanzado no punto 8 da introdución–
para, tendo en conta os principais puntos tratados nos 22 capítulos, procurar
ofrecermos as correspondentes conclusións:
1. A ciencia social naceu cando a burguesía precisaba dispor duns
instrumentos que lle permitisen coñecer un contorno que cambiaba cunha
celeridade crecente. A realidade social, entendida como un dominio de análise
nomotética, dividiuse nunhas áreas –a política, a económica e a sociocultural–
que se pretendían autónomas e que deron lugar ao nacemento de varias
disciplinas: a ciencia política, a ciencia económica, a socioloxía e a
antropoloxía. Fronte a elas situouse a historia como un modo de análise
idiográfico, co que se impuxo unha concepción ahistórica da verdade científica.
2. En contra dunha idea bastante xeneralizada, o suxeito da ciencia non é o
científico, senón o campo científico, que é o lugar no que os seus integrantes,
preocupados por monopolizar a autoridade científica, se atopan inmersos en
conflitos que son á vez políticos e científicos. A etioloxía do pluralismo no
campo da ciencia social, é dicir, das diferenzas científicas entre os axentes do
campo, haina que buscar, por unha banda, no feito de que os seus integrantes
son parte do obxecto que investigan –están ligados a el tanto racional como
afectivamente–, e, por outra banda, na posición que estes axentes ocupan no
campo, que –ao igual do que sucede no campo social– pode ser de dominación
e de subordinación.
A maiores, o feito de que no campo da ciencia social se analicen os
mecanismos que permiten manter a orde social explica a presión a que o
somete o campo político e, en xeral, a estreita relación existente entre as loitas
internas do campo científico e as loitas entre as clases no campo político. Así,
a conexión entre o canon e o poder ponse de manifesto no proceso de
canonización, no que as institucións públicas e mais os científicos sociais
situados en posicións de dominación levan a cabo a selección das obras
canónicas. Polo tanto, e na medida en que se pode producir a canonización de
666