O Estado oculto - Repositorio Institucional da USC - Universidade ...

Estes son os principais puntos tratados neste capítulo:
• Instalado sobre unha parte substancial da península ibérica, un escenario
xeoestratéxico da máxima importancia, o réxime despótico franquista
contribúe á consolidación das posicións centrais dos países capitalistas –
especialmente dos EUA, a potencia hexemónica– no campo político
internacional da Guerra Fría.
• Aínda que os aliados occidentais non consideran prioritaria a
democratización do réxime franquista, esta goza de boas perspectivas a
partir do momento no que a ditadura deixa de ofrecer garantías de
estabilidade. As poderosas elites dos partidos que, controladas (é dicir,
cooptadas e financiadas) desde o exterior (sobre todo desde as fundacións
dos grandes partidos políticos da República Federal de Alemaña), pasan a
dominar o campo político español, cumpren a condición de preservar o statu
quo socioeconómico e de reforzar o campo político, económico e militar
europeo occidental ao que España se incorpora plenamente.
• Polo tanto, a transición política española non pode ser entendida
exclusivamente como un fenómeno interno, como sucede nos modelos do
repertorio canónico funcional-pluralista. De feito, non é só que a estrutura
política interna e os seus procesos sexan indisociábeis dos factores e da
acción dos actores internacionais, senón que a dimensión internacional
perfila o proceso de transición.
• Porén, este proceso non se explicaría tampouco sen ter en conta o interese
do establishment por manterse no centro do campo político (unha vez que o
réxime despótico xa non lle ofrece garantías a longo prazo), a mobilización
social (certamente moi contida), a presión exercida pola oposición
democrática, o espallamento de contraideoloxías e os crecentes custos da
represión política.
• Os reformistas e os aperturistas gobernamentais contan coa colaboración
da moderada oposición democrática para controlar o desmantelamento do
réxime despótico desde dentro co obxectivo de substituílo por outro
540