O Estado oculto - Repositorio Institucional da USC - Universidade ...

A xeneralización da expansión corporatista: a corporatización das
funcións do Estado
A corporatización sistémica da democracia
Unha das conclusións ás que chegamos no capítulo anterior é que o
corporatismo non varre do escenario o pluralismo, polo que non pode dar conta
do conxunto dun sistema político. Dada a convivenia dos arranxos pluralistas e
corporatistas é imposíbel defender unha concepción sistémica do corporatismo.
Porén, o que si podemos constatar é unha expansión corporativa, o que nos
permite afirmar que as democracias se corporatizan. É partindo desta premisa
como interpretamos o modelo corporatista tripartito de Lehmbruch (1984b, 13),
no que un sistema está por completo corporatizado cando presenta as
seguintes características: (a) as corporacións son amplamente cooptadas no
proceso gobernamental de toma de decisións; (b) as grandes corporacións
están fortemente ligadas aos partidos políticos e participan na formación das
políticas públicas, nunha especie de reparto funcional do traballo; (c) moitas
corporacións están estruturadas xerarquicamente e a pertenza a elas tende a
ser obrigatoria; (d) as categorías ocupacionais están representadas por
corporacións non competitivas que se unen nun monopolio; e (e) as relacións
industriais caracterízanse pola forte concertación entre o goberno e as
asociacións de traballadores e de empregados (o que implica que estas
corporacións se absteñen de usar insistentemente a folga e as demais tácticas
de conflito).
Pola súa banda, Giner e Pérez Yruela (1988a, 24) van máis lonxe e
observan con preocupación como nos sistemas democráticos se están a dar
uns fenómenos que aproximan o corporatismo actual ao corporativismo clásico:
(a) unha crecente especialización funcional das corporacións, así como unha
diminución do número de corporacións dentro de cada ámbito, o que se
traduce nunha proliferación das posicións de monopolio ou de oligopolio
representativo; (b) o abandono por parte do Estado da súa posición de simple
vixilancia para asumir un papel activo nos eidos económico e social; e (c) a
294