O Estado oculto - Repositorio Institucional da USC - Universidade ...

escolar, (f) a protección do proxecto educativo do centro, e (g) a garantía dunha
formación transcendente para os fillos cuxos pais a soliciten.
Tamén a Federación Española de Religiosos de la Enseñanza –
Titulares de Centros Católicos (FERE-CECA) 1172 se atén estritamente ao
discurso eclesiástico en materia de educación confesional, xa que entende que
(a) os poderes públicos deben financiar os custos do ensino das familias que
opten por matricular a seus fillos en centros privados, de tal maneira que a
condición económica familiar non conduza a unha situación de desigualdade á
hora de exercer o dereito constituciónal á educación básica gratuíta e en
liberdade; (b) os centros privados que reciban financiamento público deben
someterse a regras que garantan o uso axeitado daquel financiamento, como a
non esixencia de prezos ou cantidades adicionais obrigatorios ao alumnado; (c)
os proxectos educativos dos centros privados –a súa identidade, o seu ideario
e mais os seus criterios de organización e de funcionamento– deben gozar do
máximo respecto, de tal maneira que non se lles pode impor aos centros
privados a organización ou o sistema de funcionamento dos públicos (cando
van máis alá duns requisitos mínimos, as regras de organización e de
funcionamento dirixidas a implementar a intervención do profesorado, dos pais
e, no seu caso, do alumnado no control e na xestión do centro, poden dificultar
inxustificadamente o exercicio dos dereitos e das responsabilidades de
dirección que lles corresponden aos titulares); (d) o financiamento público
tampouco pode converter en públicas as actividades dos centros privados,
tales como a educación ou a expresión de ideas, coñecementos e informacións
ou actitudes, que forman parte do contido esencial da liberdade das persoas; e
(e) a admisión do alumnado é unha competencia propia de cada centro privado
concertado, que poderá avaliar se os pais ou os titores dos candidatos se
identifican co carácter e co proxecto educativo do centro.
Un elemento central do discurso corporativo católico en materia de
ensino é a explicitación da finalidade proselitista –evanxelizadora, en
terminoloxía cristiá– dos centros de ensino católicos (sostidos con fondos
públicos, nota bene). Un documento particularmente revelador é La escuela
católica. Oferta de la Iglesia en España para la educación en el siglo XXI 1173 ,
onde se fala con claridade da “acción evangelizadora de la escuela católica”
641