O Estado oculto - Repositorio Institucional da USC - Universidade ...

(económica, política, etc.), é dicir, está especialmente exposta á heteronomía.
A intervención das forzas non científicas nas loitas científicas é relativamente
doada. Son varios os fenómenos que revelan a extraordinaria importancia –
sobre todo para os poderosos– do seu obxecto –a verdade sobre o mundo
social– desde o punto de vista da orde social e simbólica: (a) as fortes
presións, froito das loitas sociais externas ao campo, (b) a dificultade para
instaurar unhas condicións internas de autonomía (sobre todo no tocante á
imposición dun dereito de admisión), (c) a especial propensión dos dominados
dentro do campo científico a someterse ás esixencias externas (é dicir, o
infractor dos principios fundamentais do campo non recibe a sanción simbólica
esperábel nos campos máis autónomos se conta cos apoios sociais, materiais
e institucionais –postos de traballo, subvencións, créditos, etc.– axeitados para
compensar a súa insuficiencia) e (d) o feito de que o obxecto da ciencia social
sexan os feitos sociais, que son un produto das loitas anteriores e seguen a ser
un obxectivo das loitas actuais (é dicir, que o científico, como calquera axente
social, tende a impor o seu particular punto de vista verbo da realidade). Polo
tanto, e dada a debilidade social da ciencia social, a simple forza da razón
demostrativa é insuficiente para que a verdade científica se impoña por si
mesma no campo científico. A ciencia social é unha construción social dunha
construción social. A loita pola verdade do mundo social é interminábel porque
é o obxectivo de loitas no mundo social e no mundo da ciencia social. O
científico ten un punto de vista que non é omnisciente nin coincide co punto de
vista dos demais. Está, de feito, atrapado no mundo que intenta obxectivar, e a
ciencia que produce non é máis que unha das forzas que se enfrontan nese
mundo. O punto de vista absoluto é unha ilusión, porque todas as percepcións,
as crenzas, as expectativas, as esperanzas, están socialmente estruturadas e
condicionadas. Porén, e aínda que o pasado social sexa especialmente
determinante cando se pretende facer ciencia social, a experiencia vinculada
ao pasado debe ser mobilizada na investigación, sempre que sexa sometida
previamente a un exame crítico rigoroso que nos permita, por exemplo, tomar
conciencia dos fundamentos sociais das afinidades intelectuais. 51
No campo da ciencia política atopamos aqueles axentes que producen
obras politolóxicas. Situados en diferentes posicións (de dominación e de
51