O Estado oculto - Repositorio Institucional da USC - Universidade ...

A Congregación do Culto Divino e da Disciplina dos Sacramentos,
regulada nos artigos 62 a 70, encárgase da ordenación e da promoción da
liturxia (por exemplo, a corrección dos textos litúrxicos ou a revisión das súas
traducións), así como da validez e da licitude dos sacramentos, agás nos casos
nos que lle corresponda intervir á Congregación da Doutrina da Fe. Regulada
nos artigos 75 a 82, a Congregación para os Bispos 580 encárgase de examinar
a constitución, o cambio (a división, a unión, a supresión, etc.) e a provisión das
igrexas particulares, así como o exercicio correcto da función episcopal, sen
prexuízo das competencias da Secretaría de Estado cando interveñan
gobernos. Outra función desta congregación é a relativa ás conferencias
episcopais: constitución, revisión dos estatutos, recepción das actas e
recoñecemento dos decretos.
Os artigos 85 a 92 prevén que a Congregación para a Evanxelización
dos Pobos dirixa e coordine a evanxelización internacional e mais a
cooperación misioneira; promova as investigacións de teoloxía, espiritualidade
e pastoral misioneira; propoña principios, normas e liñas de acción; e
administre os bens destinados ás misións. Alén das competencias outorgadas
aos bispos e ás conferencias episcopais, a Congregación para os Cregos,
prevista nos artigos 93 a 98, examina o relativo ás funcións do clero secular:
vida, disciplina, dereitos e obrigas, distribución dos presbíteros, formación
continua, formación catequética (incluída a aprobación dos correspondentes
textos, sen prexuízo das competencias da Congregación da Doutrina da Fe), as
parroquias, as igrexas, os arquivos, a administración económica, o
sustentamento e a seguridade social, etc. Nos artigos 112 a 116 prevese que a
Congregación dos Seminarios e das Institucións de Estudos asuma, entre
outras, a función de supervisar o goberno e mais a actividade formativa dos
seminarios, así como a de estabelecer ou ratificar as normas rectoras dos
centros de ensino católicos.
O Pontificio Consello das Comunicacións Sociais, suxeito ao
estabelecido nos artigos 169 e 170, dedícase aos medios de comunicación
social en estreita colaboración coa Secretaría de Estado. Procura influír nos
medios en xeral e guiar os medios católicos en particular. En canto á
Administración do Patrimonio da Sé Apostólica (APSA) regulada nos artigos
358