O Estado oculto - Repositorio Institucional da USC - Universidade ...

indefinidamente, polo que procurou adiantarse á previsíbel reivindicación da
soberanía interna e externa por parte dos españois. En 1956, porén, e malia
que a oposición interna empezaba a dar mostras públicas da súa existencia,
non semellaba haber razóns para a preocupación: a solidez do réxime non se
resentía. O exército, a igrexa católica e o poder económico seguían a apoiar
firmemente o ditador. Entre 1939 e 1975, en definitiva, o réxime de Franco foi
quen de estabilizar España, e os EUA colocárono entre as súas ditaduras
protexidas. 831 En efecto, en outubro de 1961, como xa indicamos no capítulo 3,
o Grupo de Estudos Especiais do Institute for Defense Analysis elaborou o
chamado Proxecto Vulcano, un traballo patrocinado polo Pentágono que incluíu
España entre as ditaduras protexidas por parte dos EUA e propuxo unha
intervención preventiva –é dicir, política– para evitar unha actuación militar
directa no caso de que os réximes ditatoriais rexistrasen unha evolución
adversa aos intereses dos EUA.
As previsións dos EUA verbo do posfranquismo
Desde a súa coñecida posición canónica neste tema –á que nos achegamos
nos capítulos 4 e, sobre todo, 5–, Whitehead (1994, 58-59) sostén que os
vencedores da Segunda Guerra Mundial non consideraron prioritaria a
promoción da democracia en España, Portugal, Grecia e Turquía, que quedou
adiada a un futuro indeterminado, dado que estes Estados eran aliados de
confianza no enfrontamento coa Unión Soviética durante a Guerra Fría. 832
Enlazando con esta idea de Whitehead –aínda que desde un punto de vista por
completo desprovisto dos sinuosos matices deste autor–, Garcés (1996, 158-
162), apoiado nunha rica bagaxe documental, formula a seguinte tese: “En
tanto la dictadura perdurara los ciudadanos no podrían decidir
democráticamente su suerte colectiva, pero ¿cómo controlarlos después de
Franco? La respuesta al interrogante llevaría a crear las mediaciones de una
transición al posfranquismo que mantuviera los recursos de España dentro de
la Alianza bélica y a merced de los intereses del capital transnacional”. Os
plans estadounidenses tiñan como obxectivo asegurar que os líderes políticos
511