O Estado oculto - Repositorio Institucional da USC - Universidade ...

A etioloxía dunha invención: o repertorio funcional-pluralista
Das teorías da modernización ao repertorio canónico
O repertorio funcional-pluralista é un produto das teorías da modernización, e,
en concreto, da investigación sobre o desenvolvemento 128 , que naceu nos
Estados Unidos de América despois da Segunda Guerra Mundial. Almond
relata como, entre mediados dos anos corenta e mediados dos sesenta do
século XX, a International Political Science Association e mais o Committee on
Comparative Politics do Social Science Research Council estadounidense –que
Almond coñece moi ben, xa que foi o seu primeiro director en 1954 129 – puxeron
en marcha programas de estudos de política comparada que, partindo de
premisas tales como a de que non pode haber desenvolvemento económico
sen desenvolvemento político, pretendían estender o ámbito da ciencia política
empírica, afastar os estudos políticos sobre Europa e o Terceiro Mundo do
formalismo e do ideoloxismo e interpretar a reconstrución dos gobernos e das
economías de Europa a partir do remate da Segunda Guerra Mundial, así como
a explosión de nacións e os intentos de modernización no Terceiro Mundo. As
investigacións sobre o desenvolvemento intentaban atopar unha explicación
para unha situación internacional na que, mentres nunha Europa destruída
tiñan lugar axustes territoriais e se constituían novas institucións de goberno e
novos sistemas electorais, de partidos e de grupos de interese, xurdían novos
Estados no Oriente Medio, en África e en Asia. Neste contexto caótico, os
estudos de política comparada dos anos cincuenta e sesenta do século XX
representaron o intento estadounidense por comprender a nova e complexa
realidade desde un punto de vista máis sincrónico que diacrónico. Dado que os
cambios violentos e revolucionarios tiñan un alto custo en vidas humanas e en
destrución material, toda a atención púñase na orde política e na consecución
de cambios sociais co menor custo posíbel. A inclinación pluralista das teorías
do desenvolvemento non era máis que un esforzo desesperado por reintroducir
o pluralismo en sociedades que intentaban eliminalo. 130
96