O Estado oculto - Repositorio Institucional da USC - Universidade ...

Un achegamento á historia política do Concilio Vaticano II 909
A fase preparatoria
Desde 1958, Xoán XXIII dirixía unha igrexa enfrontada á modernidade e
completamente incapaz de manter a súa influencia a medio prazo nun mundo
sumido en acelerados procesos de cambio. Convén ler con atención a encíclica
Quanta cura, que publicara en 1864 o papa Pío IX, para observar con que
virulencia o pontifex maximus condenaba os “principais erros desta nosa triste
idade”. Os católicos debían abominar e fuxir “enteiramente horrorizados do
contaxio de tan cruel pestilencia”. En efecto, aqueles erros, cualificados de
“monstruosos delirios” e minuciosamente recollidos nun documento que se
publicou xunto coa encíclica, o Syllabus complectens praecipuos nostrae
aetatis errores, opúñanse, “non só á Igrexa católica e á súa saudábel doutrina e
venerandos dereitos, senón tamén á lei natural, gravada por Deus en todos os
corazóns”. De acordo coa condena xenérica da modernidade que realizaba o
Syllabus errorum, non era admisíbel o principio segundo o cal o “Romano
Pontífice pode e debe reconciliarse e transixir co progreso, co liberalismo e coa
moderna civilización”. 910 E, en particular, debían ser rexeitados, entre outros
erros, o naturalismo e o racionalismo, a liberdade relixiosa e a educación laica,
o socialismo, o comunismo e o cuestionamento do status e da autoridade da
igrexa católica. 911 Tratábase, segundo Kallscheuer (2005, 8), dun programa
cuxo núcleo era o rexeitamento intransixente de calquera compromiso co
Estado liberal e coa Ilustración.
Case cen anos despois, este inmobilismo institucional e ideolóxico
dunha igrexa católica que non se identificaba coa realidade 912 comezou a
adquirir trazos preocupantes nun mundo occidental no que a superpotencia
americana –empeñada en gañar a Guerra Fría– impuña o modelo liberal-
democrático como o máis acaído para os intereses vinculados ao capitalismo
avanzado, no que axiña xurdiron a contracultura e a liberación sexual e no que
o debate ideolóxico adquiriu unha rara intensidade que desembocou nos
acontecementos de maio de 1968. 913 Neste contexto, a encíclica Pacem in
544