O Estado oculto - Repositorio Institucional da USC - Universidade ...

76), facer “que los textos vivan en la discusión”. Pretendo construír un relato no
que os textos dialoguen entre eles para así poder interpretar unha parte
esencial da obra secundaria existente sobre a relación entre a política e a
relixión na transición española, de acordo cun modelo que faga posíbel un
estudo significativo.
A hipótese do traballo é que (a) o modelo dominante na análise do papel
político da igrexa católica durante a transición política española non resulta
satisfactorio para explicar os recursos de poder dos que dispón, e que (b) as
deficiencias e as insuficiencias deste modelo remiten á necesidade de revisar o
modelo transitolóxico canónico no seu conxunto.
Na primeira parte do traballo abordarei algunhas cuestións que coido
necesario aclarar para poder entender o meu propósito revisionista como unha
empresa lexítima en termos científicos. Basicamente, o que me interesa é
atopar unha caracterización das ideas dominantes no ámbito científico e ver se
estas ideas están dotadas de forza inmanente. Polo tanto, procurarei describir
o ámbito da ciencia social e analizar o seu pluralismo e mais a presión que
sobre el exercen os axentes políticos.
Na segunda parte vou tentar destilar os trazos básicos do relato
estándar da II República Española, da Guerra Civil e do réxime franquista, así
como ver cal é o papel que neste relato se lle atribúe á igrexa católica. Quero
saber cales son os elementos do relato convencional e mais do seu marco
referencial, e comprobar se na súa etioloxía se pode identificar un background
político. Alén disto, sería interesante poder comprobar se existe un modelo
dominante do réxime franquista. Obviamente, o meu propósito último neste
lugar é entender o modelo transitolóxico imperante en España e mais as
valoracións da igrexa católica que subxacen nel, concretamente as relativas á
andaina eclesiástica durante a democratización –é dicir, aos movementos
políticos da xerarquía católica– e mais aos vínculos entre o Estado e a igrexa
católica tal e como quedaron configurados despois do proceso de transición.
Toda esta análise presupón un achegamento aos trazos básicos dos modelos
dominantes nos que se estudan os réximes políticos como o franquista. Só
despois poderei achegarme á descrición das democratizacións como a
española: o seu comezo, as súas etapas, o seu control, a influencia exercida
31