O Estado oculto - Repositorio Institucional da USC - Universidade ...

distribución arbitraria das recompensas públicas e coa neutralización das
clases subordinadas.
Verbo do réxime despótico franquista debemos apuntar de novo, como
xa fixemos nos capítulos 4 e 12, que non nos parece viábel disimular a súa
dimensión totalizante. Giner e os seus coautores non son quen de
desprenderse, neste caso, do gradualismo formalista propio da tipoloxía
canónica dos réximes políticos, e semellan insinuar (a) a existencia dunha certa
liberdade relixiosa, así como (b) un posicionamento menos central da igrexa
católica no campo político. Porén, isto podería conducirnos a ignorar a
inxerencia masiva dos poderes públicos franquistas nos eidos social e
ideolóxico, que, en efecto, puido non ser directa, pero non por iso foi menos
masiva e efectiva, por exemplo cando, como no caso español, se exerceu a
través da igrexa católica nun campo chave como o educativo, ou a través dos
medios de comunicación. A ditadura franquista sempre tivo como obxectivo o
exercicio do control total sobre a sociedade.
Precisamente para o caso concreto do réxime despótico franquista,
Giner (1972b, 6) especifica que
surge una vasta « clase de servicio » formada por carlistas y falangistas de bajo rango,
por conservadores de clase media, dirigentes de organizaciones católicas, y por
pequeños notables locales en pueblos y barrios. Son éstos los que ocupan la
maquinaria del nuevo Estado y los únicos que tienen acceso a cualquier puesto de
mínima responsabilidad. Todo esto es puesto en marcha con la ayuda de vastas
purgas políticas –llamadas paladinamente depuraciones– y con una enérgica represión
política contra cualquier movimiento mínimamente hostil al régimen, tanto si se trata de
un cenáculo de literatos como si es algo mucho más grave como, por ejemplo, la
guerrilla, la cual alcanzará notables proporciones tras el fin de la segunda guerra
mundial.
Giner e Sevilla-Guzmán (1980, 211) insisten en que as catro clases de
servizo só dispuñan de poder delegado, o que explica que, no momento no que
se anunciou a a crise definitiva da ditadura, estes sectores sociais non fosen
quen de oporse ao cambio político que se operou nas clases hexemónicas. De
tal xeito que, despois de 1976, o persoal das clases de servizo tiña tres
opcións: (a) integrarse na democracia parlamentaria, (b) militar nos partidos de
408