O Estado oculto - Repositorio Institucional da USC - Universidade ...

circunscricións territoriais nas que se desconcentran as competencias da
central corporativa, senón de organizacións que exercen autonomamente –con
capacidade autonormativa– unhas competencias de seu. 595
Desde o noso punto de vista, o alcance do poder orixinario e da
autonomía dos bispos debe ser moi matizado na práctica: (a) como veremos no
apartado seguinte, o proceso de elección dos bispos realízase baixo un severo
control da administración central; (b) o papa, como lexislador supremo da
corporación católica, regula a autoridade episcopal; e (c) as conferencias
episcopais, cuxo labor –realizado, como acabamos de ver, por
desconcentración e cunha autonomía limitada– se atopa monitorizado pola
Santa Sé, levan a cabo unha función de coordinación imperativa dos bispos.
O Código de dereito canónico regula as igrexas particulares nos seus
canons 368 a 374. A igrexa particular defínese como un conxunto de crentes
que, baixo a autoridade dun bispo, procuran cumprir a finalidade da igrexa
católica, por regra xeral dentro dun territorio determinado. Alén da diocese (v.
infra), existen outros tipos de igrexas particulares: as prelaturas territoriais
(canon 370), as abadías territoriais (canon 370), os vicariatos apostólicos
(canon 371), as prefecturas apostólicas (canon 371.1), as administracións
apostólicas (canon 371.2) e as circunscricións de carácter persoal (os
ordinariatos castrenses e as prelaturas persoais 596 ).
A diocese
A diocese é a principal igrexa particular. Segundo Reese (2003 6 , 1-3 e 234-
242), a organización eclesiástica baséase sobre o liderado que os bispos
exercen nas dioceses, que son as unidades xeográficas nas que a igrexa
católica divide o mundo. Os bispos son nomeados polo papa despois dun
proceso moi controlado pola central corporativa –até o punto de que, a miúdo,
a igrexa particular non é consultada–, no que ao nuncio lle corresponde un
enorme protagonismo. Do que se trata é de asegurar a lealdade e a ortodoxia
episcopais, así como a implementación das políticas vaticanas no nivel
diocesano. 597
366