O Estado oculto - Repositorio Institucional da USC - Universidade ...

ase da corporación católica aínda produciu disfuncións tales como a crise dos
seminarios (v. infra).
A influencia do Concilio Vaticano II. Como veremos con detalle no
capítulo 19, os bispos españois acudiron ao concilio sen preparación e
desorientados. As súas ideas xiraban ao redor da unidade da igrexa católica e
a pureza da fe. Malia interviren con frecuencia, as súas achegas foron, en
xeral, irrelevantes. Ningún destes bispos figura entre os homes chave do
Concilio Vaticano II. Porén, acabaron adoptando unha actitude receptiva.
A entrada na xerarquía corporativa dunha nova xeración de bispos. O
Concilio Vaticano II, como xa indicamos, decretou o retiro dos bispos titulares
aos 75 anos, o que acelerou a renovación persoal da xerarquía eclesiástica.
Así, nos 11 anos comprendidos entre 1964 e 1974 consagráronse 53 novos
bispos, contra 25 nos 11 anos precedentes. Tamén baixou a idade media dos
bispos en activo, que pasou dos 65,7 anos en 1966 aos 57,7 en 1975. Polo
tanto, accedeu á xerarquía corporativa unha nova xeración que non participara
na Guerra Civil Española, con maior sintonía coa sociedade e menos
problemas para cuestionar o modelo nacionalcatólico vixente.
A Conferencia Episcopal Española. Os órganos representativos e de
traballo da corporación católica pasaron a constituírse por elección de todos os
bispos, o que explica que os factores expostos –a influencia do Concilio
Vaticano II e a entrada na xerarquía corporativa dunha nova xeración de
bispos– puidesen determinar un cambio nas actitudes e nas manifestacións
oficiais da xerarquía corporativa.
O poder social da corporación católica: a crise de adaptación en Galiza
Durante a transición, o protagonismo social da xerarquía corporativa católica
viuse sometido a un cuestionamento en ámbitos tales como o poder
económico, a capacidade de liderado, a influencia –especialmente na
educación pública–, o monopolio do sagrado (é dicir, a aparición doutras
confesións), o exercicio da censura, o poder ideolóxico e a orientación das
condutas sociais.
417