O Estado oculto - Repositorio Institucional da USC - Universidade ...

súa realización, entón diminúe o grao de de confrontación ao tempo que se
evita a sobrecarga do sistema.
A maiores de prexudicar a cidadanía, como xa apuntamos, os arranxos
corporatistas crean posicións de dominación moi marcadas no campo político
cando as corporacións diminúen en número, se especializan e deixan de
competir entre elas. Aparecen así as posicións monopolísticas, especialmente
no caso das corporacións públicas, e oligopolísticas, especialmente no caso
das corporacións semipúblicas e privadas. Outro problema asociado á crecente
corporatización é o da dependencia mutua entre o Estado e as corporacións,
que se reflicte nun intercambio de recursos políticos recíproco,
institucionalizado, obrigatorio, regular e estábel. O resultado desta tendencia
cara á hexemonía corporativa e cara á crecente confusión entre os sectores
público e privado é a privatización parcial da política: mentres corporatiza as
súas funcións para protexer a súa lexitimidade, aforrar custos administrativos e
satisfacer unha demanda corporativa, o Estado delega certas políticas públicas
nas corporacións para beneficiarse da súa capacidade técnica. Pero as
corporacións, integradas nos procesos públicos de toma de decisións –mentres
crecen, controlan sectores estratéxicos e impoñen os seus intereses–, asumen
potestades delegadas do Estado e teñen que actuar en beneficio do sistema.
Deste modo perden autonomía, é dicir, experimentan unha crecente
desprivatización funcional. As súas elites burocratízanse e hai cada vez máis
membros que accederon á base corporativa por falta de alternativas.
O proceso xeral de corporatización, con todo, non altera
substancialmente a natureza liberal-democrática dos procesos políticos: a
democracia parlamentaria pode convivir co corporatismo garantindo o
pluralismo político, os dereitos civís e mais a representación democrática. Con
todo, o sistema democrático si acusa o impacto do corporatismo. A
proliferación de consellos ou comisións asesoras e mais a aparición de canles
informais delatan a formación dun segundo circuito de representación funcional
no que se desenvolven procesos políticos parademocráticos que a cidadanía,
representada polos partidos, non é quen de controlar. O eficaz recurso ao
consenso extraparlamentario entre elites corporativas despolitiza o conflito,
pero, malia que non é necesariamente incompatíbel co sistema parlamentario,
683